搜尋
  • Progeny

我的三國志



三國志

三國志系列,唔少人既童年回憶。話說當年我係中三升中四既暑假,上朋友屋企玩三國志可以玩足三日三夜。有玩既朋友都知道,唔用威力加強版開外掛、選擇最高難度、再揀一啲垃圾君主例如士變、張魯、陶謙等基本上係九死一生,情況就有如玩大富翁,其他玩家一開始就有一萬蚊加好多地,你就得一百蚊係身。仲記得我朋友揀左孫權,我揀左公孫鑽,係冇錢冇糧冇兵既情況下,捱左唔知幾多百年既時間,最後佢統一南方,我就統一北方,不過我就係鐘意呢種九死一生既玩法,識我既都知,同我玩Fifa,我鐘意用中國、用喀麥隆,贏左先覺得過癮。諗返起當年係大學講得出「用一個書院既力量足以抵擋三個書院」既呢句說話,我諗我都係帶住呢種感覺去講。

大概因為呢種玩法對我黎講,顯得比較寫實,同現實冇咁大落差。03年屋企環境開始轉差,係當時可以做既就係努力讀書,以及中五開始係一間蚊型補習社做個小導師,每日放左學就踩單車過去,五點補到十點,一個鐘頭35蚊,叫做可以唔駛問屋企人拎錢,夠養活自己。到入左大學,幸好呢個世界上有Grant Loan呢樣野,但因為唔想畢業負債十幾萬,所以就係Year2既時候加入左而家呢個行業。


我而家身處既行業,有人可以一入職因為有家底,一年做一兩張單就收工;亦有人因為有強大既內地網絡,可以咩都唔識就有無數既內地單。但對我黎講,係我身處既行業,一路以來就好似玩緊三國志咁,冇強大既Network、亦冇家底,但憑著每一日一點一滴既累積,無數既拒絕,慶幸自己遇到既每一個客戶,擁有一班一齊拼搏既Teammate,做就我係度算係有少少成績。


Team Progeny 踏入第四年,今年希望透過建立網站網誌,為團隊服務既客戶提供更多元化資訊,並利用社交平台分享更多公司產品以外既資訊,希望藉此改變呢個行業既一貫作風,不再停留係只係介紹公司產品既傳統觀念,而係為客戶提供全面既理財資訊。

© 2017  by Progeny Group

  • Black LinkedIn Icon
  • Black Google Places Icon
  • Black Facebook Icon